مصعب بن عمرو

الحمد لله رب العالمين

رزقنا الله .. يوم اﻷربعاء 30 يونيو 2010 - 18 رجب 1431

فى تمام الساعة السادسة وخمس دقائق مساءا

بـ مصعب ...... مصعب عمرو حمدى عبد العزيز الشرنوبى :)

فاللهم أنبته نباتا حسنا .. وبارك لنا فيه .. وأعنا على تربيته كما تحب وترضى .. واجعله قرة عين لى ولوالده

يلا ... قولوا ما شاء الله ﻻ قوة إﻻ بالله ... محدش يمشى إﻻ بدعوة للنونو

هبة ربى بعد رمضان

مضى رمضان الماضى 2009 ...
وكان أول رمضان أعتكف فيه فى المسجد ولله الحمد ويااااااارب اقدر اكررها تانى

طبعا دعيت ربنا كتير .. أن يهب لنا من لدنه ذرية طيبة إنه سميع الدعاء
وفعلا .. ربنا كريييييم ﻷبعد الحدود ... جه العيد ... تأخر الموعد .. ننتظر حملا ... رحنا نعمل تحليل

التحليل اﻷول لم يثبت شئ ... كان كلام الدكتورة إنها ماتقدرش تنفى ان مفيش حمل وف نفس الوقت ماتقدرش تثبت .. ﻷن لو فيه فالهرمون ف الفترة دى ضعيف كنا مسافرين .. وكنت عايزة اتأكد .. فقالت لى برضه ماتعمليش مجهود احتياطى
خدت كلامها على إن مفيش حمل .. بس ربنا كريم .. ومفيش مشكلة .. لسه فيه أمل .. فلم يمض على زواجى سوى 6 أشهر .. واحنا مش هنقلق قبل سنة :D
المهم .. روحنا وجينا وعدت اﻻيام وفكرت اعمل تحليل تانى .. بس زوجى قاللى استنى شوية كمان كام يوم عشان يكون أكيد

وف يوم .. كنت رايحة ازور ماما .. وقلت لزوجى هعمل تحليل بالمرة .. فوافق .. وكنت حاسة بلهفته أكبر منى المهم .. اتلككت بحجة عبيطة عشان انزل من عند ماما وعملت التحليل .. بس ماقدرتش استنى ﻷن النتيجة بعد 20 دقيقة ﻷن الوقت كان اتأخر .. فخدت تليفونهم وقلت له انا عايزة النتيجة شفوى وهتصل بيكم
رحت لماما .. وانا بَعِدّ الثوانى قبل الدقايق .. واستنيت 30 دقيقة مش 20 .. عشان تبقى النتيجة أكيد ظهرت .. ودخلت اﻷوضة لوحدى واتصلت بالمعمل طبعا فاكرة المكالمة بتفاصيلها إلى اﻵن

أنا : السلام عليكم ورحمة الله .. معمل ....

الكيميائى ( وﻻ مش عارفة اسمه بيبقى ايه الصراحة ) : نعم يافندم

أنا : كنت عملت عندكم تحليل دم لاختبار حمل من نص ساعة وقلت هتصل اشوف النتيجة

الكيميائى : أيوة يافندم .. ممكن رقم الكود اللى مع الوصل اللى مع حضرتك

أنا : أيوة الرقم ..............

الكيميائى : أيوة يافندم .. معايا مدام ............

أنا : أيوة

الكيميائى : التحليل Positive يافندم

أنا ( وكأنى ماسمعتش منه حاجة .. وكأن كلامه تحصيل حاصل ) : أيوة طيب آخد النتيجة امتى ؟

الكيميائى : بكرة ف أى وقت يافندم

أنا ( لسه مش مستوعبة ) : طيب وهل ممكن اعرف الحمل كان من امتى بالظبط وكدة ؟

الكيميائى : أيوة يافندم طبعا .. بس دة تحليل تانى يتطلب عينة تانية من حضرتك

أنا ( بدأت افوق ) : طيب .. يعنى يافندم نتيجة التحليل دة أكيدة يعنى .. Positive أكيد يعنى

الكيميائى ( وهو يضحك ) : أيوة يافندم .. حضرتك حامل والله .. ألف مبروك

أنا : طيب جزاكم الله خيرا .. متشكرة جدا .. السلام عليكم

الكيميائى : وعليكم السلام



وخرجت من اﻷوضة وانا بحمد ربنا كتييييييييير ﻻقيت ماما جاية تكلمنى .. قلت لها ماما .. أنا حامل ماصدقتش ... وحضنتنى وباستنى .. وقعدت تشكر ربنا كتير قوى .. وتقولى ان قلبها كان حاسس وقتها كنت حامل بقالى أسبوعين فقط وحكيتلها قصة المعمل والمكالمة وبتاع ... وكلمت زوجى فورااااااااا بشرته بالخبر وكان مستنى مكالمتى على نار ومش هقولكم كان فرحان قد ايه فاللهم لك الحمد

ودى كانت البداية بداية أول حمل ليا اللى كان بداية أول يوم فيه 7/10/2009 وبعدها بأسبوعين .. كانت النطفة ...........

أول مرة حمل

السلااااااااام عليكم ورحمة الله وبركاته

عودة مرة أخرى للتدوين

طبعا شايفين الصورة .. أهو دة حالى دلوقتى

كان نفسى أدون من أول شهر حمل عشان اكتب كل خواطرى .. لكن ملحوقة .. ﻷنى قررت اكتبها دلوقتى

قبل ما ييجى اﻷخ واتلخم بيه :D

وعقبال عندكم جميعا

وستتوالى سلسلة رسائل من اﻵن .. عن حملى اﻷول

يسره الله لى وجعله قرة عين لى ولوالده .. وأنبته نباتا حسنا

فهستأذنكم ناخد هدنة شوية من حبيبتى (( ولو )) إلى حين .. ولنا عودة بعد السلسلة ان شاء الله

فابقوا معنــــــا :cheer:

6/2/2009

عمرو وفراى يوم الجمعة
كتبوا كتابهم .. إوع

كانت براءة .. وكنا نُربى

قالولنا زمااااااااان ...

الأطفال كلهم براءة

بس واضح .. ان البراءة اختفت .. يا إما مابقاش فيه حاجة اسمها أطفال
أيوة بتكلم عن أطفال الزمن دة
تحس وانت بتتكلم معاهم انك بتكلم رجل ذو خيرة وباع فى الحياة

تحس وانت بتتعامل معاهم انك بتعامل شاب مش فارقة معاه الدنيا .. مش هامه حد .. بيبحث عن نفسه


مش هدور هما فقدوا جزء من برائتهم ليه ؟؟

بس هسأل .. نرجعها تانى ازاى ؟؟؟؟؟؟

******
اشتغلت من كام يوم مُدرسة ابتدائى

أولى - تالتة - رابعة

الولاد .. مش لاقى طريقة تعاملهم بيها غير انك تزعق وتتجهم وتشد عشان يسكتوا ويسمعوا الكلام ويسيبوك تشرح
ودة مايمنعش انهم بيحبوك جدا جدا
ويشوفوك يهجموا عليك عشان تسلم عليهم وبس :D

هما محتاجين حد يستوعبهم .. يحتويهم .. يخرج كل الطاقة اللى جواهم بالشكل اللى يعجبهم مش بالريموت كنترول

اسكت دلوقتى .. اتكلم دلوقتى .. اضحك دلوقتى .. وقف دلوقتى .. من غير ما يفهم

****

نفسى نربيهم كويس .. مش بس نحشى دماغهم معلومات ممكن يقروها ونطبق نظام تعليم ماحناش راضيين عنه وجرنا مساوئه كويس

بس الظاهر اننا محتاجين وقت طويييييل .. عشان نطور نفسنا لوحدنا
ماناخدش كل الخبرات السابقة .. فيتنقلنا نظام التدريس الموروث
محتاجين ندخل جوة عقول الأطفال أكتر
نحس بيهم أكتر
محتاجين نفهمهم .. فهيفهمونا

بس تفتكروا ان دة ينفع من موقعى هذا كمُدرسة
وياترى هياخد وقت قد ايه ؟؟

مع ان كل الل حوايا بيقولولى احشى دماغهم .. وراكى مفتشين .. أهالى عايزين يحسوا ان ولادهم بياخدوا حاجات مفيدة وكتير ..

رأيكو ايه
استسلم .. ولا اقول

ولو ............ ؟؟

ماذا تفعل لو ؟؟؟

المرة دى هنستخدم - ولو - من غير ثلثها الأول ..

تفتكر ....... !!!

لو تقدر تعرف وتتدخل فى غيب أحد الأشخاص ... هتتدخل ؟؟

يعنى عرفت حاجة هتحصله ف المستقبل .. بس لازم هوة اللى ياخد القرار بنفسه .. ويختار بإرادته .. يمشى ف الطريق دة ولا الطريق التانى اللى انت شايف انه أحسن له لأنك عندك شوية معلومات عن المستقبل دة ف نفس الوقت هوة مايعرفش عن الطريق التانى حاجة .. ويمكن مش واخد باله انه فيه إمكانية طريق تانى أصلا

تفتكر .. هتنبهه ؟؟

هتتدخل ؟؟

ولا ساعتها تخاف .. لأنه لازم ياخد القرار بنفسه ولوحده فعلا ..

ومش مشكلتك ولا مشكلته انك تعرف حاجة عن مستقبله هوة مايعرفهاش

وبعدين انت تضمن منين ان اللى انت تعرفه دة الخير فعلا ؟؟

هوة يمكن كدة من وجهة نظرك .. بس تعرف منين

عشان كدة الأحسن تسيب الأمور تمشى على علاتها .. ولا كأنك عرفت حاجة

وقضاء ربنا هوة اللى هيكون .. سواء تدخلت انت أو لأ

هوة الواحد بس بيبقى صعبان عليه الناس :( .. بس بيبقى محتار

اقول - ولو - واقولهم اللى اعرفه ويقرروا براحتهم .. بس هيحتاروا قوى وهيقعوا ف مطب ويمكن ساعتها ابقى عكيت لأنه مكانش المفروض يعرفوا

ولا اقول - لو - وماقولش .. وساعتها لو مشيوا ف الطرق اللى انا مش شايفه احسن بيصعبوا عليا .... ياااااااااااااه .. لو كانوا يعرفوا بس


حد فاهم حاجة ؟؟

بجد حاجة تحير .. وتتعب ..

وهنا تيجى - لو أو ولو - وتحشر نفسها كالعادة .. وتسألك


أيهما تختار

وتعمل ايه ... لو ..... !!!!

فرصتك .. للعودة

جاء رمضان بلياليه العشر

ومضت منهم ليلة

اعذرونى .. مفيش قدامى فرصة تانية .. غير التسعة دول

لذا .. لن أتمكن من الدخول على النت حتى هذه الفترة

وموعدنا .............. بعد صلاة العيد - ان شاء الله - ..

ويمكن قبلها بساعات

كل عام وأنتم جميعا بألف خيـــــــــــر ... مقدما :)