كانت براءة .. وكنا نُربى

قالولنا زمااااااااان ...

الأطفال كلهم براءة

بس واضح .. ان البراءة اختفت .. يا إما مابقاش فيه حاجة اسمها أطفال
أيوة بتكلم عن أطفال الزمن دة
تحس وانت بتتكلم معاهم انك بتكلم رجل ذو خيرة وباع فى الحياة

تحس وانت بتتعامل معاهم انك بتعامل شاب مش فارقة معاه الدنيا .. مش هامه حد .. بيبحث عن نفسه


مش هدور هما فقدوا جزء من برائتهم ليه ؟؟

بس هسأل .. نرجعها تانى ازاى ؟؟؟؟؟؟

******
اشتغلت من كام يوم مُدرسة ابتدائى

أولى - تالتة - رابعة

الولاد .. مش لاقى طريقة تعاملهم بيها غير انك تزعق وتتجهم وتشد عشان يسكتوا ويسمعوا الكلام ويسيبوك تشرح
ودة مايمنعش انهم بيحبوك جدا جدا
ويشوفوك يهجموا عليك عشان تسلم عليهم وبس :D

هما محتاجين حد يستوعبهم .. يحتويهم .. يخرج كل الطاقة اللى جواهم بالشكل اللى يعجبهم مش بالريموت كنترول

اسكت دلوقتى .. اتكلم دلوقتى .. اضحك دلوقتى .. وقف دلوقتى .. من غير ما يفهم

****

نفسى نربيهم كويس .. مش بس نحشى دماغهم معلومات ممكن يقروها ونطبق نظام تعليم ماحناش راضيين عنه وجرنا مساوئه كويس

بس الظاهر اننا محتاجين وقت طويييييل .. عشان نطور نفسنا لوحدنا
ماناخدش كل الخبرات السابقة .. فيتنقلنا نظام التدريس الموروث
محتاجين ندخل جوة عقول الأطفال أكتر
نحس بيهم أكتر
محتاجين نفهمهم .. فهيفهمونا

بس تفتكروا ان دة ينفع من موقعى هذا كمُدرسة
وياترى هياخد وقت قد ايه ؟؟

مع ان كل الل حوايا بيقولولى احشى دماغهم .. وراكى مفتشين .. أهالى عايزين يحسوا ان ولادهم بياخدوا حاجات مفيدة وكتير ..

رأيكو ايه
استسلم .. ولا اقول

ولو ............ ؟؟

ماذا تفعل لو ؟؟؟

المرة دى هنستخدم - ولو - من غير ثلثها الأول ..

تفتكر ....... !!!

لو تقدر تعرف وتتدخل فى غيب أحد الأشخاص ... هتتدخل ؟؟

يعنى عرفت حاجة هتحصله ف المستقبل .. بس لازم هوة اللى ياخد القرار بنفسه .. ويختار بإرادته .. يمشى ف الطريق دة ولا الطريق التانى اللى انت شايف انه أحسن له لأنك عندك شوية معلومات عن المستقبل دة ف نفس الوقت هوة مايعرفش عن الطريق التانى حاجة .. ويمكن مش واخد باله انه فيه إمكانية طريق تانى أصلا

تفتكر .. هتنبهه ؟؟

هتتدخل ؟؟

ولا ساعتها تخاف .. لأنه لازم ياخد القرار بنفسه ولوحده فعلا ..

ومش مشكلتك ولا مشكلته انك تعرف حاجة عن مستقبله هوة مايعرفهاش

وبعدين انت تضمن منين ان اللى انت تعرفه دة الخير فعلا ؟؟

هوة يمكن كدة من وجهة نظرك .. بس تعرف منين

عشان كدة الأحسن تسيب الأمور تمشى على علاتها .. ولا كأنك عرفت حاجة

وقضاء ربنا هوة اللى هيكون .. سواء تدخلت انت أو لأ

هوة الواحد بس بيبقى صعبان عليه الناس :( .. بس بيبقى محتار

اقول - ولو - واقولهم اللى اعرفه ويقرروا براحتهم .. بس هيحتاروا قوى وهيقعوا ف مطب ويمكن ساعتها ابقى عكيت لأنه مكانش المفروض يعرفوا

ولا اقول - لو - وماقولش .. وساعتها لو مشيوا ف الطرق اللى انا مش شايفه احسن بيصعبوا عليا .... ياااااااااااااه .. لو كانوا يعرفوا بس


حد فاهم حاجة ؟؟

بجد حاجة تحير .. وتتعب ..

وهنا تيجى - لو أو ولو - وتحشر نفسها كالعادة .. وتسألك


أيهما تختار

وتعمل ايه ... لو ..... !!!!

فرصتك .. للعودة

جاء رمضان بلياليه العشر

ومضت منهم ليلة

اعذرونى .. مفيش قدامى فرصة تانية .. غير التسعة دول

لذا .. لن أتمكن من الدخول على النت حتى هذه الفترة

وموعدنا .............. بعد صلاة العيد - ان شاء الله - ..

ويمكن قبلها بساعات

كل عام وأنتم جميعا بألف خيـــــــــــر ... مقدما :)

وكان فضل الله عليك عظيما

ImageChef.com

رمضاننا

يا بلدى .. عشانك بس

ومن تانى

وهفضل اقولها بلسانى

بتوحشنى .. ووحشانى ( عشانك بس )

سنين الغربة والمواويل

وييجى الليل

يصحصح فينا من تانى

أمل تانى

يفوق جوانا حلم جميل

ولا بنيأس .. ولا لليأس نستسلم

ولا بنسكت

ونسكت ليه ؟! ..

ونكتم حلم ف قلوبنا .. يدمرنا .. ونسكت ليه ؟!!!

واحنا اللى بإيدينا الخلاص .. هنفوق خلاص ؟

بنفوق خلاص ؟

ولسه الحلم جوانا ..

ينادى ف ليل

هتطلع شمسه من تانى

ولو

بالليل ...

مفيش فايدة

الظاهر انها ف دمى

ايوة .. سامعاك بتسأل .. هيا ايه ؟؟

كلمة (( ولو ))

عفريت .. بيطعلى كل شوية .. يدينى أمل ويختفى

انا ايه اللى خلانى اروح الناحية دى

المفروض انى قررت اعمل مدونة .. عشان اكلم نفسى فيها

اصلح عيوبها .. ابوظها زيادة .. اهرب منها

لكن الظاهر انى مبعرفش ..

هتفضل معايا .. محاوطانى .. مش عارفة افكر لنفسى

مش قادرة افكر لوحدى

مش عايزة اسيبها ..

ــــــــــــــــــــــــ على رأى اللى قال ـــــــــــــــ

ولو فيكى يسيل دمى

كفاية ينطقك فمى

دا انا تعبت من التنهيد

ما انا نفسى اموت فيكى وابقى شهيد

دة يوم العيد .. ومستنيه بقالى سنين

,,,

إصرار غريب

بيشدنى .. بيهزنى

بيخلينى ارجع واقول .. ولو

وومهما حصل .. مش هسكت .. وهفضل اقول ..ولو

ايه اللى ممكن يحصل .. ؟؟؟

ضع فى يدى القيد .. ألهب أضلعى بالسوط .. ضع عنقى على السكينِ

لن تستطيع حصار فكرى ساعة ... أو نزع إيمانى ونور يقينى

فالنور فى قلبى .. وقلبى فى يدى ربى .. وربى ناصرى ومعينى

سأعيش معتصما بحبل عقيدتى .. وأموت مبتسما .. ليحيا دينى

هتطلع مجنون .. هتطلع عبيط .. هتطلع فيك كل عيوب الدنيا - اللى مابقيتش دنيا

تقدر تقوللى .. تسوى ايه الدنيا لو احنا مش قادرين نعيش فيها ؟!!

طب اعيش فيها ليه ؟؟

عشان ربنا خلقنا فيها .. وضعنا فيها .. وأمرنا نعبده ونعمرها

طب اعيش فيهاازاى ؟؟

هيا دى المشكلة ..

والسؤال دة اما يتسئل دلوقتى .. غير لما اتسأل زمان

دلوقتى مالوش إجابة .. غير إحباط ويأس وناس عايشة وخلاص زى ما مركبها توديها .. ان شا الله تغرقها

لكن غصب عنك .. تلاقيها طالعة من جواك

بتصرخ .. بتقاوم .. آخر ذرة أمل

بترد على كل اللى بيقولك .. استسلم بقى .. مابقاش فيها فايدة

ترد بأعلى صوت ...



برضه ..

ولو

ولو

ولو ...

بنقولها كتييييييييير .. بس يا ترى نقصد بيها ايه ؟؟!!

ولو شيلنا أول حرف .. هتبقى ( لو ) .. وفى الحديث ( لو ) تفتح عمل الشيطان

لكن يدخل عليها حرف واحد .. يغير معناها كله .. وتبقى ( ولو )

ممكن نقصد بيها .. الاحتمال .. وبتكون نتيجته غالبا معروفة مسبقا

كما ورد فى قوله تعالى .. " ولو رحمناهم وكشفنا ما بهم من ضُرّ .. للجّوا فى طغيانهم يعمهون "

وممكن نستخدمها كناية عن أمل داخل صدورنا قد لا يكون له سببا منطقيا

ساعات بمعنى (( حتى لو ))

يعنى حد يقولك حاجة .. وانت تقوله .. ولو

طب ليه اخترت الإسم دة ........

كان نفسى اخرج حاجة جواية .. ف مكان محدش يعرفنى فيه

اصرخ
ابكى
اضحك

اشجع نفسى وابهدلها

بس ف مكان خاص ..

لوحدى

فاخترت التدوين .. وقررت اكتب .. ولاقيتنى - من غير ما افكر - بقول

ولو .. أيوة

ولو